ޓެކްނޮލޮޖީ
ދަތުރުވެރިންގެ ބޯޑިންގ ޕާސްތަކުގެ ފޮޓޯ ސޯޝަލް މީޑިއާގައި ހިއްސާ ނުކުރުމަށް ސައިބާ ސެކިއުރިޓީ މާހިރުން ވަނީ އިންޒާރު ދީފައެވެ. ބޯޑިންގ ޕާހުގައި ހުންނަ ބާކޯޑާއި ޒާތީ މައުލޫމާތުތައް ބޭނުންކޮށްގެން ހެކަރުންނާއި ސްކޭމަރުން ނާޖާއިޒު ފައިދާ ނަގައި، މީހުންގެ ޒާތީ މައުލޫމާތު ވަގަށް ނެގުމުގެ ފުރުސަތު އޮތުމުން މިފަދަ ކަންކަމަށް ސަމާލުވުމަށް މާހިރުން އިލްތިމާސްކުރެއެވެ.
ދަތުރުފަތުރުކުރާއިރު ބޯޑިންގ ޕާސްގެ ފޮޓޯ ނަގައި ސޯޝަލް މީޑިއާގައި ހިއްސާ ނުކުރުމަށް ސައިބާ ސެކިއުރިޓީގެ މާހިރުން އިންޒާރު ދީފިއެވެ. މާހިރުން ފާހަގަކުރި ގޮތުގައި ބޯޑިންގ ޕާހުގައި ހިމެނޭ ބާކޯޑާއި ކިއުއާރް ކޯޑު ފަދަ މައުލޫމާތުތަކުގެ އެހީގައި، ނޭނގި ނަމަވެސް ފަސިންޖަރުންގެ ޒާތީ މައުލޫމާތާއި ދަތުރުގެ ތަފްސީލުތައް ފަސޭހަކަމާއެކު ހޯދުމުގެ ފުރުސަތު ހެކަރުންނާއި ނުބައި ނިޔަތް އޮންނަ ފަރާތްތަކަށް ލިބިގެންދެއެވެ. މިފަދަ މައުލޫމާތުތައް ބޭނުންކޮށްގެން މީހުންގެ ޒާތީ މައުލޫމާތު ވަގަށް ނެގުމާއި، ދަތުރުގެ ބުކިންގ ބަދަލުކުރުން ނުވަތަ ކެންސަލްކުރުން ފަދަ ނުރައްކާތެރި އަމަލުތައް ހިންގުމުގެ ފުރުސަތު ބޮޑުކަމަށް ސައިބާ މާހިރުން ވަނީ ބަޔާންކޮށްފައެވެ. އެހެންކަމުން ދަތުރުވެރިންގެ ޒާތީ ރައްކާތެރިކަމަށްޓަކައި، ބޯޑިންގ ޕާސްގެ އެއްވެސް މައުލޫމާތެއް އާންމުކޮށް ސޯޝަލް މީޑިއާ ޕްލެޓްފޯމުތަކުގައި ޕޯސްޓް ނުކުރުމަށް އެ ފަރާތްތަކުން ވަނީ އިލްތިމާސްކޮށްފައެވެ.