ތިމާވެށި

ޕީއެންސީގެ ކޮންގްރެސްގައި ބައިވެރިވި 1،119 މަންދޫބުންގެ އިއްތިފާގުން ފާސްކުރި ގަރާރަކުން، 2028 ވަނަ އަހަރުގެ ރިޔާސީ ޓިކެޓް ޕްރައިމަރީއަކާ ނުލައި ރައީސް ޑރ. މުޙައްމަދު މުޢިއްޒަށް ދިނުމަށް ނިންމައި ޕާޓީގެ ޗެއާޕާސަން ޢަބްދުއްރަޙީމް ޢަބްދުﷲ އެމަނިކުފާނާ ޓިކެޓް ވަނީ ހަވާލުކުރައްވާފައެވެ. އެމްޑީޕީގެ ރިޔާސީ ޕްރައިމަރީއާ ގުޅޭގޮތުން ދޮންބިލެތް އަހުމަދު ވާހަކަދައްކަވާފައިވާއިރު، ޕީއެންއެފްގެ މެންބަރޝިޕް ކެމްޕޭނާ ގުޅިގެން އިލެކްޝަންސް ކޮމިޝަނަށް ވަނީ ފާޑުކިޔުން އަމާޒުވެފައެވެ. ސިޔާސީ ޕާޓީތަކަށް ދައުލަތުން ދޭ ފައިސާ ދިނުން ހުއްޓާލުމަށް ރަޝީދާ ޔޫސުފް ވަނީ ގޮވާލައްވާފައެވެ. ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް ވިއްކާލަން އުޅޭކަމަށް އިދިކޮޅު ފަރާތްތަކުން ތުހުމަތުކުރި ނަމަވެސް، ރައީސް މުޢިއްޒާއި ހައުސިންގ މިނިސްޓަރު ޑރ. ޢަބްދުﷲ މުއްޠަލިބު ވަނީ އެ ތުހުމަތުތައް ދޮގުކުރައްވައި އެއީ ކުއްޔަށް ދިނުން ކަމަށް ވިދާޅުވެފައެވެ. ރައީސް އޮފީހުގެ ނޫސްވެރިންގެ ބައްދަލުވުންތަކަށް "އަދަދު" ނޫހުގެ ނޫސްވެރިން ނުވެއްދުމަށް ނިންމާފައިވާ ނިންމުން ބާތިލްކުރުމަށް އެދި އެ ނޫހުން ސިވިލް ކޯޓަށް ވަނީ ދައުވާއެއް ހުށަހަޅާފައެވެ.