ތިމާވެށި
ހުޅަނގު މޫސުމުގެ ބާރުގަދަވެ މޫސުން ގޯސްވުމާ ގުޅިގެން، ކ. އަތޮޅުން ފެށިގެން އދ. އަތޮޅާ ހަމައަށް ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ވަނީ ޔެލޯ އެލާޓް ނެރުމުގެ އިތުރުން މުޅި ރާއްޖެއަށް ވައިޓް އެލާޓް ވެސް ނެރެފައެވެ. ދެކުނުގެ ސަރަހައްދުތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން އައްޑޫ ސިޓީއާއި ފުވައްމުލަކަށް އޮރެންޖް އެލާޓް ނެރެފައިވާއިރު، އައްޑޫ ސިޓީ ފޭދޫގެ 70 އަށް ވުރެ ގިނަ ގޭގައި ފެންބޮޑުވެ ގެއްލުންތައް ވަނީ ލިބިފައެވެ. މީގެއިތުރުން ވައިގަދަވެ ބޯކޮށް ވާރޭވެހުމުގެ ސަބަބުން ތ. ކަނޑޫދޫގެ ދަނޑުބިންތަކަށް ބޮޑެތި ގެއްލުންތަކެއް ވަނީ ލިބިފައެވެ. މާލެ ސަރަހައްދަށް އުދައެރުމުގެ ސަބަބުން ރަސްފަންނު ސަރަހައްދަށް ވެއްޔާއި ގާގަނޑުތައް އަރައި، އިންޑަސްޓްރިއަލް ވިލެޖުގައި ޕާކުކޮށްފައި ހުރި އުޅަނދުތަކަށް ލޮނުއެޅި ގެއްލުންތައް ލިބުނެވެ. ކަނޑުތައް ގަދަވެ ރާޅުގެ އުސްމިން 4 ފޫޓާއި 7 ފޫޓާ ދެމެދަށް އުފުލޭނެ ކަމަށް ލަފާކޮށްފައިވާތީ، ޔެލޯ ނުވަތަ އޮރެންޖް އެލާޓްގެ ވަގުތުތަކުގައި ކަނޑުދަތުރު ނުކުރުމަށާއި ސަލާމަތީ ފިޔަވަޅުތައް އެޅުމަށް އެމްއެންޑީއެފުން ވަނީ އިލްތިމާސްކޮށްފައެވެ.
ރާއްޖޭގެ އެކި ސަރަޙައްދުތަކަށް މޫސުން ގޯސްވެ ވިއްސާރަ ކުރަމުންދާތީ، މޫސުމާ ބެހޭ ޤައުމީ އިދާރާއިން ވަނީ ސަމާލުވުމަށް އެދި މޫސުމީ އިންޒާރުތައް ނެރެފައެވެ. މި ވިއްސާރައިގައި ގިނަ ރަށްތަކަކަށް ބޯކޮށް ވާރޭވެހި، ވައިގަދަވެ އަދި ކަނޑުތައް ގަދަވާނެ ކަމަށް ލަފާކޮށްފައިވާތީ ކަނޑުދަތުރުފަތުރު ކުރާ ފަރާތްތަކުން ޚާއްޞަ ސަމާލުކަމެއް ދިނުމަށް ކަމާބެހޭ އިދާރާތަކުން އިލްތިމާސްކުރެއެވެ. މީގެ އިތުރުން ވިއްސާރައާ ގުޅިގެން ފެންބޮޑުވުން ފަދަ ގެއްލުންތަކުން ރައްކާތެރިވުމަށް ދުރާލާ ފިޔަވަޅުތައް އެޅުމަށާއި، މޫސުމާ ބެހޭ އެންމެ ފަހުގެ މަޢުލޫމާތު ހޯދައިގެން ކަންކަން ރޭވުމަށް ރައްޔިތުންނަށް ވަނީ އަންގާފައެވެ.