ބައިނަލްއަޤުވާމީ
ސައުދީ އަރަބިއްޔާގެ ރިޔާޟާއި މަދީނާ ސަރަހައްދުގައިވާ އީސްޓް-ވެސްޓް ތެޔޮ ހޮޅިއަށާއި ތިން ޕަންޕިން ސްޓޭޝަނަކަށް އަމާޒުކޮށް އިރާގުގެ ސަރަހައްދުގެ ތެރެއިން ފޮނުވާލި ޑްރޯން ހަމަލާތަކެއްގައި އާންމުން ޒަހަމްވެ، އަލިފާން ރޯވުމާ ގުޅިގެން ސައުދީ އަރާމްކޯއިން ތެޔޮ ހޮޅީގެ މަސައްކަތް ވަގުތީ ގޮތުން މެދުކަނޑާލައިފިއެވެ. ސައުދީ އަރަބިއްޔާގެ ސިޔާދަތަށާއި މުހިންމު ވަސީލަތްތަކަށް އަދި ސަރަހައްދީ ހަމަޖެހުމަށް ނުރައްކާވާ ގޮތަށް ދިން މި ފިނޑި ހަމަލާ ދިވެހިރާއްޖޭގެ ފޮރިން މިނިސްޓްރީން 2026 ސެޕްޓެމްބަރު 12 ވަނަ ދުވަހު ވަނީ ހަރުކަށި އިބާރާތުން ކުށްވެރިކޮށް، ސައުދީ ސަރުކާރާއެކު ދިވެހިރާއްޖެ ސާބިތުކަމާއެކު އޮތްކަން ހާމަކޮށްފައެވެ.
ސައުދީ އަރަބިއްޔާގެ ތެޔޮ ހޮޅިއަކަށް އަމާޒުކޮށް ދިން ޑްރޯން ހަމަލާތަކެއް އެ ގައުމުގެ ސަރުކާރުން 12 ސެޕްޓެމްބަރު 2026 ގައި ހަރުކަށި އިބާރާތުން ކުށްވެރިކޮށްފިއެވެ. ސައުދީން ބުނެފައިވަނީ މިފަދަ ފިނޑި ހަމަލާތަކަކީ ހަމައެކަނި އެ ގައުމުގެ މުހިންމު ވަސީލަތްތަކަށް ދެވޭ ހަމަލާއެއް ނޫން ކަމަށާއި، މިއީ މުޅި ދުނިޔޭގެ ހަކަތައިގެ ރައްކާތެރިކަމަށާއި އިގްތިސާދީ ހަމަޖެހުމަށް ދެވޭ ނުރައްކަލެއް ކަމަށެވެ. އަދި ގައުމުގެ ސަލާމަތާއި ތެލުގެ އުމްރާނީ ވަސީލަތްތައް ރައްކާތެރިކުރުމަށް އަޅަންޖެހޭ ހުރިހާ ފިޔަވަޅުތަކެއް ވަރުގަދަކޮށް އަޅަމުންދާނެ ކަމަށް ވެސް އެ ގައުމުގެ ކަމާބެހޭ ފަރާތްތަކުން ވަނީ ހާމަކޮށްފައެވެ. މީގެއިތުރުން، ބައިނަލްއަގުވާމީ މުޖުތަމައުން މިފަދަ ޓެރަރިސްޓް އަމަލުތައް ކުށްވެރިކޮށް، ހަކަތައިގެ މައި މަގުތައް ހިމާޔަތްކުރުމަށް އެއްބާރުލުން ދިނުމަށް ސައުދީން ވަނީ ގޮވާލާފައެވެ.