ބައިނަލްއަޤުވާމީ

އދ. ގައި ހުރިހާ ޤައުމުތަކެއް ހަމަހަމަކަމާއެކު ތަމްސީލުވުމަށް ދިވެހިރާއްޖެއިން ވަކާލާތު ކުރާނެ ކަމަށް ރައީސުލްޖުމްހޫރިއްޔާ 2026 ސެޕްޓެމްބަރު 22 ވަނަ ދުވަހު ވިދާޅުވެއްޖެއެވެ. އެމަނިކުފާނު މިކަން ހާމަކުރައްވާފައިވަނީ ބައިނަލްއަޤްވާމީ މައިދާނުގައި ކުދި ޤައުމުތަކުގެ އަޑު އިއްވައި، އދ. ގެ ނިޒާމުގެ ތެރޭގައި ހުރިހާ މެންބަރު ޤައުމުތަކަކަށްވެސް އިންސާފުވެރި އަދި ހަމަހަމަ ފުރުޞަތުތަކެއް ލިބެންޖެހޭނެ ކަމަށް ބާރުއަޅުއްވަމުންނެވެ. މިގޮތުން، ބައިނަލްއަޤްވާމީ މުހިންމު ނިންމުންތައް ނިންމުމުގައި ކުދި ޖަޒީރާ ޤައުމުތަކުގެ ޙައްޤުތަކާއި ކަންބޮޑުވުންތައް ފުރިހަމައަށް ތަމްސީލުކުރުމަށްޓަކައި ދިވެހިރާއްޖެއިން މެދުކެނޑުމެއްނެތި މަސައްކަތް ކުރަމުންދާނެ ކަމުގެ ޔަޤީންކަން ރައީސް ވަނީ ދެއްވާފައެވެ. ދުނިޔޭގެ މަސްރަޙުގައި ދިމާވާ ގޮންޖެހުންތަކުން އަރައިގަތުމަށް ހަމަހަމަ ބައިވެރިވުން ކޮންމެހެން މުހިންމުކަން ފާހަގަކުރައްވައި، ރާއްޖޭގެ ޚާރިޖީ ސިޔާސަތުގެ ތެރެއިން މިކަމަށް އިސްކަންދެއްވާނެ ކަމަށްވެސް އެމަނިކުފާނު ވިދާޅުވިއެވެ.

ދިވެހިރާއްޖެއާއި ކެންޔާއާ ދެމެދު ސިޔާސީ މަޝްވަރާތައް ބޭއްވުމުގެ އޮނިގަނޑެއް އެކުލަވާލުމުގެ ގޮތުން ދެ ގައުމުގެ ދެމެދުގައި ފަހުމުނާމާއެއްގައި (އެމްއޯޔޫ) ސޮއިކޮށްފިއެވެ. އެމެރިކާގެ ނިއުޔޯކުގައި ކުރިއަށްދާ އދ. ގެ ޢާންމު މަޖިލީހުގެ 81 ވަނަ ސެޝަންގެ ހަވާސާގައި ބޭއްވުނު ރަސްމިއްޔާތެއްގައި، ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ ފޮރިން މިނިސްޓަރު އިރުތިޝާމް އާދަމްއެވެ. އަދި ކެންޔާ ސަރުކާރުގެ ފަރާތުން ސޮއިކުރެއްވީ އެ ޤައުމުގެ ޕްރައިމް ކެބިނެޓް ސެކްރެޓަރީ އަދި ފޮރިން އެންޑް ޑައަސްޕޯރާ އެފެއާޒް މިނިސްޓަރު ޑރ. މުސާލިއާ މުދަވާދީއެވެ. މި ފަހުމުނާމާގެ މައިގަނޑު މަގުސަދަކީ ދެ ގައުމުގެ ޚާރިޖީ ވުޒާރާގެ މެދުގައި ގަވާއިދުން މަޝްވަރާތައް ބާއްވައި، ދެމެހެއްޓެނިވި ގޮތެއްގައި ގުޅުން ބަދަހިކޮށް އެކި ދާއިރާތަކުން އެއްބާރުލުން އިތުރުކުރުމެވެ. ރާއްޖެއާއި ކެންޔާއާ ދެމެދު ޚާރިޖީ ގުޅުން ޤާއިމުކޮށްފައިވަނީ 23 އޮކްޓޫބަރު 1995 ގައެވެ.