ތަޢުލީމު
ކިންގްސް ކޮމަންވެލްތު ފެލޯޝިޕް ޕްރޮގްރާމް (ކޭސީއެފްޕީ) ގެ ދަށުން ފުލީ ފަންޑެޑް އަންޑަގްރެޖުއޭޓް ފެލޯޝިޕްތައް ފޯރުކޮށްދޭ ރަސްމީ މަރުކަޒެއްގެ ގޮތުގައި ވިލާ ކޮލެޖު ހަމަޖައްސައި، އެ ކޮލެޖުގެ 5 ޑިގްރީ ޕްރޮގްރާމަކަށް ކުރިމަތިލުމުގެ ފުރުޞަތު އެސޯސިއޭޝަން އޮފް ކޮމަންވެލްތު ޔުނިވަރސިޓީސް (އޭސީޔޫ) އާ ގުޅިގެން 2026 ސެޕްޓެންބަރު 21 ގައި ވަނީ ހުޅުވާލާފައެވެ. މި ފެލޯޝިޕްގެ ދަށުން 2027 ވަނަ އަހަރު ކިޔެވުން ފެށުމަށް ހަމަޖެހިފައިވާ ފުރުޞަތުތަކަށް ކުރިމަތިލުމުގެ އެންމެ ފަހު ތާރީޚަކީ 2026 އޮކްޓޫބަރު 14 ކަމަށް ވިލާ ކޮލެޖުގެ ވައިސް ރެކްޓަރ، އެސޯސިއޭޓް ޕްރޮފެސަރ ޑރ. ޢަލީ ނަޖީބު ވަނީ ހާމަކުރައްވާފައެވެ.
އެސޯސިއޭޝަން އޮފް ކޮމަންވެލްތު ޔުނިވާސިޓީސް (އޭސީޔޫ) އިން އިނގިރޭސިވިލާތުގެ ރަސްގެފާނު ޗާލްސް ތިންވަނައިގެ އިސްނެންގެވުމުގެ ދަށުން ހިންގާ "ކިންގްސް ކޮމަންވެލްތު ފެލޯޝިޕް ޕްރޮގްރާމް" ގެ ރާއްޖޭގެ ހޯސްޓް އިންސްޓިޓިއުޝަނަކަށް ވިލާ ކޮލެޖު ހަމަޖެހި، ކިޔަވައިދިނުމުގެ ފުރުސަތުތައް ހުޅުވާލައިފިއެވެ. ކޮމަންވެލްތުގެ ކުދި ޖަޒީރާ ގައުމުތަކަށް އަމާޒުކޮށްގެން ހިންގާ، ހުރިހާ ޚަރަދެއް ހަމަޖައްސައިދޭ މި ފެލޯޝިޕްގެ ދަށުން ވިލާ ކޮލެޖުގައި ނާސިން، ޕްރައިމަރީ އަދި ސްޕެޝަލް އެޑިއުކޭޝަން ނީޑްސް ޓީޗިން، އަދި ސިވިލް، މެކޭނިކަލް އަދި އިލެކްޓްރިކަލް އެންޑް އިލެކްޓްރޯނިކްސް އިންޖިނިއަރިން ފަދަ މުހިންމު ފަސް ދާއިރާއަކުން ފުރަތަމަ ޑިގްރީ ހާސިލުކުރުމުގެ މަގު ވަނީ ފަހިވެފައެވެ. ރާއްޖެއިން މި ޕްރޮގްރާމްގެ އަންޑަގްރެޖުއޭޓް ޕާތުވޭގެ ހޯސްޓް އިންސްޓިޓިއުޝަނެއްގެ ގޮތުގައި ހޮވުނު ހަމައެކަނި މަރުކަޒަކީ ވިލާ ކޮލެޖެވެ. މި ފުރުސަތުގެ މައިގަނޑު މަގުސަދަކީ ކުދި ޖަޒީރާ ގައުމުތަކަށް ދިމާވާ ތަރައްގީގެ ގޮންޖެހުންތަކާއި މޫސުމީ ބަދަލުތަކުން އަރައިގަތުމަށް ބޭނުންވާ ގާބިލު މީހުން ބިނާކުރުމަށް އެހީތެރިވެދިނުމެވެ.