ސިއްހަތު
ތީމޯރ-ލެސްޓޭގެ ވެރިރަށް ދިލީގައި ކުރިއަށްދާ ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) ގެ ދެކުނު އިރުމަތީ އޭޝިއާ ސަރަހައްދީ ކޮމިޓީގެ 79 ވަނަ ބައްދަލުވުމުގައި، ގައިންގަޔަށް ނާރާ ބަލިތަކުގެ ސަބަބުން ދިމާވާ މަރުގެ ނިސްބަތް ދަށްކުރުމަށް ކަނޑައަޅާފައިވާ ދެމެހެއްޓެނިވި ތަރައްގީގެ ލަނޑުދަނޑި (އެސްޑީޖީ) 2030 ގެ ކުރިން ހާސިލުކުރި ހަމައެކަނި ގައުމަކަށް ރާއްޖެ ވުމުންނާއި ވިހެއުމާ ގުޅިގެން ޖެހޭ ޓެޓަނަސް ނައްތާލެވިފައިވާ ހާލަތު 10 އަހަރު ވަންދެން ދަމަހައްޓާފައިވާތީ ދިން ހާއްސަ އެވޯޑާ، ދިވެހިރާއްޖޭގެ ފަރާތުން މިނިސްޓަރ އޮފް ހެލްތު، ފެމިލީ އެންޑް ވެލްފެއަރ ޖީލާ އަލީ ވަނީ 2026 ސެޕްޓެމްބަރު 9 ގައި ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އަދަނޮމް ގެބްރެޔެސުސްގެ އަތްޕުޅުން ހަވާލުވެވަޑައިގެންފައެވެ.
ރާއްޖޭގެ ސިއްހީ ދާއިރާއިން ހޯދަމުންދާ ފާހަގަކޮށްލެވޭ ކާމިޔާބީތަކުގެ އަގުވަޒަންކޮށް، ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ދޭ ހާއްސަ އެވޯޑެއް ދިވެހިރާއްޖެއަށް ލިބިއްޖެއެވެ. މި އެވޯޑަކީ ރާއްޖޭގެ އާންމު ސިއްހަތު ރައްކާތެރިކުރުމަށާއި، ބަލިތައް ކޮންޓްރޯލްކޮށް ނައްތާލުމަށް ސިއްހީ ނިޒާމުގެ ތެރެއިން ކުރަމުންދާ މުހިންމު މަސައްކަތްތަކުގެ ނަތީޖާ ބަލައިގަނެ ދީފައިވާ ޝަރަފުވެރި އެވޯޑެކެވެ. މިއީ ރާއްޖޭގެ ސިއްހީ ހިދުމަތްތެރިންނާއި ކަމާބެހޭ އިދާރާތަކުން ގުޅިގެން ކުރަމުން އަންނަ ބުރަ މަސައްކަތްތަކަށް ލިބުނު ބޮޑު ކުރިއެރުމެއް ކަމުގައި ބެލެވެއެވެ. އަދި ބައިނަލްއަގުވާމީ ފެންވަރުގައި ލިބުނު މި އެވޯޑުގެ ސަބަބުން، ކުރިއަށް އޮތް ތަނުގައިވެސް ސިއްހީ ދާއިރާ އިތުރަށް ހަރުދަނާކޮށް ރައްޔިތުންނަށް ފޯރުކޮށްދޭ ހިދުމަތްތައް ފުޅާކުރުމަށް އިތުރު ހިތްވަރެއް ލިބިގެންދާނެއެވެ.